ஒளி விளக்கு

எத்தனை எத்தனை தெய்வங்கள் கண்டோம் 

அத்தனையும் ஒன்றுதானே

நித்தமும் காலையில் கண்விழித்தால் முன்னே

நிற்பதோர்  சூரியன்தானே

மத்தியில் உச்சியில் மாலயில் காலையில்

மாறிக் கோலம் கொண்ட போதும்

அத்தீயில் காணும் அனல் விளக்கு எங்கள்

அன்பெனும் வாழ்வுக்கொளியே

சத்தியமும்கொண்டு நித்தியமாய் ஆதி 

சக்தியென்று நம்புகின்றேன்

புத்தியறிந்த வரையிலும் கண்டவன் 

பக்தியும் கொண்டதனாலே 

சித்தி கொண்டேயவள் சொல்லுங்கருத்தினை

செந்தமிழில் கவிசெய்தே 

உத்தம இன்பங்கள் காணுகிறேன் இது

ஏற்றிய தீபத்தொளியே

வற்றியும் போவதே யில்லை உலகினில் 

வாழ்வி லன்பெனும் நீதி

கற்றிருந்தும் பயன்கொள்வதில்லை அக

கண்களை மூடிடும் வேளை

உற்றதும் பெற்றதும் உள்ளவலிகளே 

ஓடிச்செல் தெய்வத்தைநாடு

சற்றுப்பொறு கூறு சஞ்சலம்  போக்கிட

சக்திதானே வேண்டும் சக்தி